Bible

1 大衛王向全會眾宣告：「𠊎个孻仔所羅門係上帝所揀選个；總係佢還後生，無經驗。佢所愛完成个工程非常大；因為這毋係起給人住个王宮，係為到主上帝起个聖殿。 2 𠊎盡最大个努力為𠊎上帝个聖殿準備材料，有金銀銅鐵、木材、高貴个石磚、寶石、有花紋个石頭、㧯盡多个大理石。 3 因為𠊎盡愛𠊎上帝个聖殿，所以𠊎除了預備這兜以外，還對𠊎个財產當中拿兜金仔㧯銀仔出來，做起上帝聖殿个路用。 4 𠊎拿出百零公噸最好个金仔㧯大約兩百四十公噸个純銀仔，拿來貼聖殿个壁， 5 還有金仔做金器，銀仔做銀器，並供給逐種師傅製造个需要。這下，有麼人歡喜奉獻禮物給上主？」 6 所以，逐宗族族長、以色列逐支族官長、千人㧯百人个指揮官、王室財產个管理人，全部歡喜來奉獻。 7 佢等為到起上帝个聖殿奉獻一百七十零公噸金仔、三百四十零公噸銀仔、銅仔大約六百二十公噸、㧯三千四百公噸鐵仔。 8 有寶石个人全部拿出來奉獻，放入上主聖殿个寶庫，交給革順族个利未人耶歇管理。 9 因為這兜領袖甘心樂意奉獻給上主，人民就盡歡喜，大衛王也非常歡喜。 10 大衛王在全會眾面前頌讚上主。佢講：「上主—𠊎等祖先以色列个上帝啊，願你受頌讚直到永永遠遠！ 11 上主啊，你盡偉大；你有大能大力、榮光、威嚴。天頂地下所有个全部係你个；你係君王，你係至高，係萬物个主宰。 12 所有富足㧯尊榮對你該位來；你用你个力量、權柄統治萬有。使人尊貴、強盛个就係你。 13 𠊎等个上帝啊，這下𠊎等感謝你，頌讚你榮光个尊名！ 14 「𠊎㧯𠊎个人民實在無資格拿麼介獻給你；因為萬物全部係你所賜个，𠊎等只有將屬你个東西還給你定定。 15 𠊎等在你面前係暫住个旅客㧯流浪个人，就像𠊎等个祖先共樣。𠊎等个人生像影仔共樣會無掉去，無可能長存。 16 上主—𠊎等个上帝啊，𠊎等將這所有財物帶來，愛起一座聖殿，來榮光你个聖名。這一切係對你該位來个，也係屬你个。 17 上帝啊，𠊎知你鑒察人心；你歡喜正直个人。𠊎用正直个心，歡歡喜喜將這一切獻給你。這下𠊎看到你个子民也歡歡喜喜帶等禮物來獻給你。 18 上主—𠊎等祖先亞伯拉罕、以撒、以色列个上帝啊，求你使你子民个心永遠對你熱誠，又使佢等永遠對你忠心。 19 求你俾𠊎个孻仔所羅門全心遵行你所有个法律、命令㧯例規，來成就一切，用𠊎所預備个來起你个聖殿。」 20 然後，大衛吩咐全會眾：「愛頌讚上主—你等个上帝！」全會眾就頌讚上主—佢等祖先个上帝。人民恭恭敬敬敬拜上主，也對王行禮。 21 第二日，以色列人民㓾盡多頭牲做牲儀獻給上主，然後分給大家食。另外，佢等又㓾一千隻牛牯，一千隻綿羊牯，一千隻細羊仔做燒化祭獻給上主。佢等也獻盡多祭酒。 22 該日，佢等在上主面前食啉，非常快樂。人民第二擺宣佈大衛个孻仔所羅門做王。佢等奉上主个名膏油設立佢做佢等个統治者，也膏油設立撒督做祭司。 23 所以所羅門承接厥爸大衛做王；這王權係上主所賜个。所羅門係一個成功个君王；以色列全國順從佢。 24 所有个官員㧯軍人，甚至大衛王其他个孻仔，全部發誓順服所羅門王。 25 上主使以色列全國敬服所羅門，又使所羅門个威嚴超過佢以前該兜以色列王。 26 耶西个孻仔大衛做王統治全以色列。 27 佢做王總共四十年：在希伯崙做王七年，在耶路撒冷做王三十三年。 28 大衛享受榮華富貴，食到盡老正過身；佢个孻仔所羅門承接佢做王。 29 大衛王一生人个事記在先見撒母耳、先知拿單、先見迦得个歷史書底背。 30 這兜書講起：大衛个統治㧯佢个勇敢，也記載佢㧯以色列還有鄰國所經歷个事。